Istorgia
Igls 18 da november 1979 èn Franco Simonet, Adrian Demarmels e Stefan Demarmels sa scuntros per l`amprema geda per far musica. Franco ed Adrian on dumando a Stefan, schi el mussess a sunar trumbeta.Stefan veva gia caschung d`amprender a sunar trumbeta alla clostra da Mustér. Ed uscheia sa scuntravan els treis sonda per sonda per far prova. Igl è betg ia dei, tgi oters, tgi levan er sunar en instrumaint da flo, èn nias vetiers. Igl crap, tg`è nia patto ainten l`ava, ò tratg adegna pi grondas ondas. Igl ò do bler da far per tots, pertge igls pi blers na savevan betg liger notas e vevan er via per l`amprema geda ena trumbeta, en cornet u en bass. La scola da musica dalla val ò pir antschet a funcziunar chels onns. Igls instrumaints, cun igls quals i niva suno, eran regals dad otras uniuns u compras privatas.
La gruppa dalla musica da giuvenils ò galdia la bagnvuglientscha dalla populaziun da Mon, Salouf e Stierva. Curt taimp siva, santiv`ins gio la gruppa a sunar an baselgia, per occurrenzas da giubileums, festas d`anniversari e per radunanzas d`uniuns.
Igls 18 d`otgover 1986 ègl sto schinavant. Igl crap patto ainten l`ava, ò furmo ulteriours rentgs anc pi gronds: la radunanza ò decidia da fundar la Musica instrumentala Salouf – Mon – Stierva. Igls giovens eran mutivos, graztga agl sustign dalla populaziun indigena, e sa preschentavan an uniformas blavas. Igl artist barmeir, Ludwig Demarmels, ò creo igl motiv per ena belezza bandiera per l`uniun. Naturalmaintg totga tar ena bandiera ena madretscha ed en padregn. Madretscha dalla bandiera è Maria Sonder da Salouf e padregn Vinzens Albertin da Mon.
Igls musicants giovens creschan pero, er or dallas uniformas. Graztga all`uniun da musica da Wangen sper Olten, vign la musica instrumentala an possess d`en`uniforma nova an cotschen-neir. Igls 6/7 da zarcladour 1998 ègl alloura schi gliunsch e l`uniun ò pudia festivar las atgnas uniformas.
La musica vign er sustigneida generousamaintg digls treis cumegns e da privats. Uscheia ins pògl er cumprar novs instrumaints. La musica ò antschet scu musica da giuvenils, oz appartignan ad ella er musicants activs d`annadas pi viglias. Da nov èn nias vetiers er musicants dad otras vischnancas dallas dus vals. La musica sunga an furmaziun da harmoneia.
Las provas on li scu da bel`antschatta la sonda seira. La cuminanza vign tgirada bagn ainten l`uniun ed igls musicants sa regordan gugent dallas festas da musica cantunalas e regiunalas. Surtot dalla festa da musica districtuala a Salouf igl onn 2006. La musica instrumentala Salouf – Mon – Stierva è davantada en`uniun dalla val.